«We’s quietscht – de chunnts i füf Minute»

Bern

Die Berner Fasnacht hat begonnen. Das Quietsch-Tram, Dr. Guttenberg und die Polit-Prominenz sind Opfer der Schnitzelbänke 2011.

hero image

(Bild: Karikatur: Max Spring)

Sandra Rutschi

Zibelegringe

I bi dr Urs vom Bärepark, Ursina heissen ig itz; o mys Brüederli isch neu es Schwösterli, ke Witz! Die Genital-Chaflerei wäri sicher besser usecho, we me Chlosterbrüeder oder Bischöf hätti gno.

E mega Prinze-Hochzyt söll s im April z London gäh; Tassli mit em Brutpaar druf chasch itz scho gseh. D Queen hett o es paar übercho, u seit Dank. Si hett drum nümm alli Tasse im Schrank.

Mit 5 Medaille z Garmisch muess me z fride sy: 4 us ächtem Läder, und e silbrigi drüber-y. Es paar Athlete sy i de Stange blybe b hange oder bim Renne uf de Piste verlore gange.

Dr Elton John u sy Ma hei es Bébé übercho. Anderi Schwule-Pärli mache das ou eso. Das chasch hütt vo re Leihmuetter la usbrüete, zum Befruchte chasch dr Köfferli-Muni ufbiete.

4 vo de 5 Gmeindrät wei i Nationalrat gah; e super Idee, mir chöi voll derhinder stah. Mir hoffe’s fescht, dä Wächsel wäri ganz famos, nume eso wärde mir se ändlech los.

Nach dr Abstimmig über d’Armeewaffe muesch im Hushalt keni neue Regle schaffe. Es blybt, dass z Gwehr im Chleiderschaft darf stah, u dr Lover, wes pressiert, unders Näscht mues gah.

Fertig Harem, jetz geits o em Berlusconi a Chrage, Mubarak u Ghadafi chan er nümm um Hilf a-frage. Blybt no dr Papst, wär weiss, mit Asyl im Vatikan? Mit ere Soutane, zum wyter gfätterle unde-dran?

Google StreetView, wo s mi us em Sässel rysst: Dasch doch my Hund, wo da vor z Bellevue schysst! I reklamiere bim Dateschützer u verlange drüber-y, dass my Hund und sy Gagel müesse verpixlet sy.

Die drei Musketiere

U das Bändli wo d Worber i Stadt sötti bringe wülls nümm ganz blau isch, gits roti Gringe drzue tuets no göisse, da muesch d Ohre vrha drum wott mes nöi touffe: VU-VU-ZE-LA.

Gäg Durchfall heig är als probiert, het mir ä schlaue Meier gseit. Banane, Schoggi, Sagmähl u Watte, s heig alles nüt abtreit ! Ou Chapsle wo är heig gno, sig wider cho, chum heig är se gässe Ds mingscht heig är se gratis übercho, bir MIGROS a dr Kasse

Jetz chöi mir d Waffe bhalte ja, mir hei das nid ganz grafft das klaare Resultat, nid mal Lumengo hätt das gschafft sit vierzg Jahr dörfe d Froue stimme, doch dasmal nid ganz frei, vom Maa dr Louf am äcke, schribt ä Jedi «NEINEINEI !»

Lang, ewig lang het das Bohrloch denn grunne Me het alles probiert u glich hets nüt brunge U mir behoupte, üse Fuchs hät das Wunder vollbracht Dä hätti, das Löchli mit Wonne vrmacht.

Im Deutschen draussen, wisst Ihr Leut, da geht es ziehmlich link Dort wandelt sich ein Wetterfrosch, uf zmau zumne Schmutzfink zu de Schwoobe passt dä guet, gloubets üs, da isch öppis drann weil im Schranke von dem Herrn, da fehlen ein paar Kacheln-mann.

Üse Stapi, dä tuet abnäh, emu ds mingscht äs Bizeli wobi das isch nid liecht – är isch ja nie äs Schwärgwicht gsi.

Was unterscheidet d Gigi Oeri, vomne Fuessball ohni Seich, im Gägestz zum Gigi isch bim Fuessball ds Läder weich

Wöschwyber

D Schiinati isch ar WM unger d Schniider gange. Si fädle i u blibe ar e Stange hange. Für ne besseri Medaliebilanz u ds Imitsch z rette, Hätte mer dene no es paar auti Fasnachtsplaggette.

Bärn tuet fiire, Bärn tuet feschte im wiude Weschte. Ds Tram Bärnwescht wird iigweiht, aues steit zum Beschte. U das hie druf, das isch der feissi Feschttagsbrate. Dr Thomas Fuchs isch unger ds Tram vo Bümpliz grate.

Bir Dokterarbet het dä Guttenberg ganz ghörig bschisse. Är isch dr Dokter los, sis Amt het är o gschmisse. O är steut Mängu fescht bir Diss, das bewiist sis edlä Wäse. Immerhin, är het sini Diss jitz wenigschtens gläse. Politisch chöi mir Froue üs sit 40 Jahr engagiere. Tüe ir Gmeind u im Kanton, sogar im Bund regiere. Säubschtbewusst träte mir uf i Deux Pièces, Jeans u Liibli. Jä gäu, drum si die Bärli im Bärepark beides Wybli.

Die beschti Armee wott är, aber s wott eifach nid glinge. Es Computersyschtem, wo me nid bruucht, s git roti Gringe. Vetterliwirtschaft, Panzer verschwinde, Puff über beidi Ohre. Eh lue, jitz hei mer dr Murer no i däm huerä Puff verlore.

Quiiiiitsch. Es Tram chunnt umen Egge. Quiiitsch. Mir tüe üs jitz uf d Schiine legge. Quiiiiitsch, nei! Mer dräje düre u Bärn mobil tuet sech winde. Sorry, Mani, mir lö das Sächsitram i Himmu la entschwinde.

Handgranate, Gwehr, Munition u Bajonett Versorgt mi Aut geng no deheime ungerem Bett. Das Bett e Feschtig, dä het drum Schiss wie au die Affe, Nit vor mim Chuechetröli, nei, vor mire Wunderwaffe.

Die eint macht, was si wott u chas o dürestiere. Die angeri grinset breit, tuet dr Verchehr brav reguliere. Die Dritti schnappt d Finanze, die Nöji schlückt läär u du versteisch – Miecht us däre furchtbar gärn Bü Bü Bü Bündnerfleisch.

Die Schwarze

Wills z'Qatar immer heiss tuet chutte, Wott me ar WM gar nid schutte, Anstatt z'schwitze, wie ne Depp, Spielt me eifach chli «Tschou Sepp!»

Am Ogi si im Gotthard d'Träne cho, S' het ne schier fasch übernoh, O üs tuet das Loch z'tiefscht inne weh; Eh ja, mir hei halt d'Rächnig gseh!

Der Blocher sig ä MotherXXXXer Seit der Tschäppät nach em sächste XXXX, Hei Alex, dä Spruch isch nid so schlächt, Mängisch hei halt o d'Narre rächt!

D' Calmy-Rey, mir chöis verstah, Wott vo sich kes Föteli ha, Denn der Fotograf müesst usefinde: Was isch vore, was isch hinde! U i de Tram wirds geng wie änger, U d'Trämli wärde geng wie länger: Bisch vore z'Bümpliz, de isch bigoscht Z'Füdle vom Tram no geng z'Bärnoscht!

Dass der Blocher amne andere «Hitler» seit, Gloubt ke Mönsch, wit u breit, Das macht dä nid, das isch nie gscheh, Är het nume sich im Spiegel gesh!

Der Papst als Kirchoberhoupt, Het, me gloubts fasch nid, z'Kondom erloubt. Ja äs würd der Wält chli besser gah, Hätte sini Eltre o eis gha!

Z'Dütschland gits itz – s'isch nid dumm – Äs total nöis Studium: Nach 14 Tag isch dert jederma Dokter Wikipedia!

Äs het ä stächige Blick u strubi Haar, Chunnt us de Bärge, das isch klar, Macht de Manne Angscht, git keim e Muntsch, Eh ja, das isch doch... z'Evelyne Wittwer Schlumpf.

Dr Pfannehouer

Fragt es früntlechs Mändi mit Iichoufs-Chorb: «Wann bitte fährt des nägschte Tram nach Worb?» «Ja, da müesst Dir, Mano, Öich nid schpute: We’s quietscht, de chunnts i füf Minute»

Mi muess o ds Positive finde: Das Trämli gseht sogar e Blinde Linie G, 6, Q(uietsch) ? Si tüe wärweisse, wi das Tram schlussäntlech de söll heisse. Linie G miech wider Sinn: Im Minimum e Gummi drin Vo Worb Dorf über Langeloh im Quitschino zum Casino Vo dert uus chasch, es isch gedige, ohni Gummi jedes Tram beschtige.

50,6 Prozänt for him, für di «ungeteilti Schtandes-Schtimm» De isch dr unbeteiligt Schtimme-Schtand 49,4 - dasch allerhand Mit so viil um-beschtimmtem Schtandes-Teil wird d Schtandes-Schtimm als Schtimm vom Land zum Teil-Beschtand.

Für nid total i Släng abzrütsche, sött me gwüssi Schlüsselwort iidütsche Human Ressources: Püetzer-Masse, Investmentbanking: Bargäld-Jasse Fastfood-Menu: Schnällfrass-Gschlaber, Facebook-Profil: Privatsach-Glaber Dr Medie-Chef heisst Zitt-Versuumer, und CEO si Gwinn-Abruumer Nanotech heisst Gartenzwerg, und copy-paste heisst Guttenberg.

O Guttenberg, du gscheelet-smarte Hättsch bis zur Fasnacht chönne warte ! Itz chöme d Merkel-Frou und ii – wi di alti Fasnacht hingedrii: Amne Schlöidersitz–Fallschirm vo dr Bundeswehr Schwäbt dr Guttenberg – und er wund’ret sech sehr: «Bi am Radar ghockt u ha wi gäng dr Kopierchnopf trückt - u plötzlech machts päng !» cha nümm ufecho, und jitz isch k.o. – wi lang no ? Chumm mir wei go wandere, vo eim Guttenberg zum andere, wüll wenn de d Wahle düre si, de chehrt er wider um !

Wällebrächer

Dr BZ iiri Brichterstattig zum Ranze vom Tschäppät macht kai Gattig. Verliert dä drei Kilo, gits e Headlines. Fyr mini zää Kilo inträsiert sich kai Schwein.

Z Ameerika gits gly Waale, vil Stedt schryybe rooti Zaale. Mir kemme druus, mir hälfe gärn und schigge d Hayoz nach New Bärn.

Bletzlig gyggs und pfyffs ganz gräll, du spirsch e Drugg uf em Drummelfäll. Wietet e Demo bim Casino? Do seeschs blau Bäänli umme Egge koo.

Lut Expärte wird Bärn Provinz. Die kemme nit druus, dene Deppe spinnts. Hät me d Fasnacht au bemässe, kennt me Ziiri glatt vergässe.

Dr attraggtyyvi Bäärephargg entlaschtet dr Basler Zolli staarg. Sythär faare die Schwoobe-Schnuure, oni z halte z Basel duure.

D Emanze sin hyt nimmi e Gfoor. Wär hätt das dänggt vor 40 Joor, dass unseri Schwyz nit undergoot mit soo vyl Wiiber im Bundesroot.

Träffpunkt Bärn – Baanhoofhalle, dert dyn Schlachtryyf scheen erschalle. Do joolt e gäl-schwarze Fesche, YBi Maischter – im Duurscht lesche.

Myyni Väärs sin kai Blagette. Kai Blagiat, sait Babette. Sithär bi au yych vil frächer ire Doktor Wällebrächer.

Gas-Latärne

Bisch ou i däm Reige, oder schaffsch Du no ohni? De fragsch Di jede Monet, öb sech z Schaffe no lohni? Oder bisch süchtig uf Gwinnoptimierig! Fragsch Di: warum bringt Dir Manage nüt aus Hohn i? Ja, i däm Fall, (leider), bisch äs Opfer vo de Manager-Boni!

Bisch am Wandere, Bike, wosch i Chindergarte gah? Nimm di in Acht vor Pittbull, Dobermann & Co.! Gross vo Gsetz gah parliere - u aus grad wieder vergässe! Für serig Hirni si die Hünd ou nie ä Gfahr! Wele Hund würdi scho äs Löcherbecki frässe!?

He Du, Bäri... wach ändlech uf! Mir wei Di 30.Geburi fiire! Di uf de Händ dür d' Gasse trage! Bevor dass äs richtig los geit han ig no zwee Frage: hei Di itz d' Gugge gweckt, oder isch es z Trämli? bim Andere ha ig Hemmige..bisch äs Wiibli, oder äs Männli?

Neu isch är nümm; doch, wie heisst är scho? Är sigi aus Ersatz für das Ding us em Putzschrank cho! Im Gägesatz zu däm Ding, isch är am Muure. Tuet höchschtens vor beschte Armee vor Wäut umeschnure!

Schweinegrippe u anderi Chrankheite gäh üs z' biisse. Tagelang hocke ig uf em Tron, cha nume schi….! Jitz passed aber richtig uf. Äs geit vou i' ds Krasse! Am allerschlimmschte zwäg si üsi Chrankekasse!!

D' Schtadtboute setze die Bäre-Plakat 10cm z' höch obe. Dänkmau; verstoubeti Hirni wette z' Gliiche! Aber witer abe! Scho si d' Schtadt-Ämter mit äm ne schwäre Stritt-Fall konfrontiert. Chum abe Bäri, das isch doch normal. Die mache das gägesitig und d' Arbeit isch ne garantiert!

Berner Zeitung

Diese Inhalte sind für unsere Abonnenten. Sie haben noch keinen Zugang?

Erhalten Sie unlimitierten Zugriff auf alle Inhalte:

  • Exklusive Hintergrundreportagen
  • Regionale News und Berichte
  • Tolle Angebote für Kultur- und Freizeitangebote

Abonnieren Sie jetzt